2024 ലെ അന്റാർട്ടിക്കൻ പര്യവേഷണസംഘം. അന്റാർട്ടിക്കയിലെ വെളുത്ത മരുഭൂമി. തണുത്തുറഞ്ഞ കാറ്റും ശൂന്യമായ ആകാശവും മാത്രം കൂട്ടിനുള്ള ആ വിദൂരഭൂമിയിൽ മനുഷ്യൻ തന്റെ അറിവിന്റെ അതിരുകൾ തേടി ഒരു വലിയ യാത്ര തുടങ്ങി. ജർമ്മനിയിലെ ആൽഫ്രഡ് വെഗനർ ഇൻസ്റ്റിറ്റ്യൂട്ടിലെയും (Alfred Wegener Institute) മറ്റ് അന്താരാഷ്ട്ര ഗവേഷണ സ്ഥാപനങ്ങളിലെയും ശാസ്ത്രജ്ഞരാണ് അവർ.
അന്റാർട്ടിക്കയിലെ 'EPICA ഡ്രോണിംഗ് മോഡ് ലാൻഡ്' (EPICA Dronning Maud Land) എന്ന പ്രദേശത്ത് അവർ തമ്പടിച്ചു. ലക്ഷ്യമിട്ടത് ഭൂമിയുടെ ചരിത്രം എന്നതിലുപരി, കോടിക്കണക്കിന് വർഷങ്ങളായി മഞ്ഞുപാളികൾക്കിടയിൽ നിന്നും എന്തെങ്കിലും വിവരങ്ങൾ ലഭിക്കുമോ എന്നതായിരുന്നു. അവർ കുറെ പാളികൾ ഖനനം ചെയ്തെടുത്തു. തുടക്കത്തിൽ കേവലം മഞ്ഞുപാളികൾ മാത്രമായി തോന്നിയ 295 കിലോഗ്രാം വരുന്ന സാമ്പിളുകൾ ലബോറട്ടറിയിൽ എത്തിയതോടെ കഥ മാറി. 40,000 മുതൽ 81,000 വർഷം വരെ പഴക്കമുള്ള ആ മഞ്ഞുപാളികൾക്കുള്ളിൽ ശാസ്ത്രജ്ഞർ കണ്ടെത്തിയത് അസാധാരണമായ ഒന്നായിരുന്നു: 'അയൺ-60' (Iron-60) എന്ന അപൂർവ്വ റേഡിയോ ആക്ടീവ് ഐസോടോപ്പ്
ഭൂമിക്ക് സ്വാഭാവികമായി നിർമ്മിക്കാൻ കഴിയാത്ത ഒന്നാണ് ഈ അയൺ-60. ഭീമാകാരമായ നക്ഷത്രങ്ങൾ മരിക്കുമ്പോൾ സംഭവിക്കുന്ന 'സൂപ്പർനോവ' (Supernova) എന്ന ഭയാനകമായ സ്ഫോടനത്തിലൂടെ പ്രപഞ്ചത്തിലേക്ക് ചിതറിത്തെറിക്കുന്നവയാണിവ
ഇവിടെയാണ് ആ സിനിമാറ്റിക് വഴിത്തിരിവ്. ഭൗമശാസ്ത്രജ്ഞർ നടത്തിയ ഈ കണ്ടെത്തൽ വെളിപ്പെടുത്തിയത്, നമ്മൾ ജീവിക്കുന്ന ഭൂമി ഒറ്റപ്പെട്ട ഒന്നല്ല എന്നാണ്. നമ്മുടെ സൗരയൂഥം നിലവിൽ സഞ്ചരിച്ചുകൊണ്ടിരിക്കുന്നത് നക്ഷത്രപൊടികൾ നിറഞ്ഞ 'ലോക്കൽ ഇന്റർസ്റ്റെല്ലാർ ക്ലൗഡ്' (Local Interstellar Cloud) എന്ന പ്രപഞ്ചമേഖലയിലൂടെയാണ്
കഴിഞ്ഞ പതിനായിരക്കണക്കിന് വർഷങ്ങളായി നമ്മുടെ സൗരയൂഥം നടത്തിയ ഈ കോസ്മിക് യാത്രയുടെ ഓരോ അടയാളങ്ങളും ഈ മഞ്ഞുപാളികൾ കൃത്യമായി രേഖപ്പെടുത്തിയിട്ടുണ്ട്
ചുരുക്കത്തിൽ, അന്റാർട്ടിക്കയിലെ ആഴമേറിയ മഞ്ഞുപാളികൾ ഭൂമിയുടെ കാലാവസ്ഥാ ചരിത്രം മാത്രമല്ല, പ്രപഞ്ചത്തിന്റെ അതിരുകൾക്കുമപ്പുറത്തേക്ക് നീളുന്ന ഒരു 'കോസ്മിക് ട്രാവൽ ഡയറി' (Cosmic Travel Diary) തന്നെയാണ് ഉള്ളിൽ ഒളിപ്പിച്ചിരിക്കുന്നത്! നമ്മൾ നക്ഷത്രങ്ങളുടെ മക്കൾ മാത്രമല്ല, നക്ഷത്രങ്ങളുടെ അവശിഷ്ടങ്ങൾക്കിടയിലൂടെ സഞ്ചരിക്കുന്ന ഒരു യാത്രക്കാർ കൂടിയാണ് എന്ന സത്യമാണ് ഈ മഞ്ഞുപാളികൾ ലോകത്തോട് വിളിച്ചുപറയുന്നത്
إرسال تعليق