ന്യൂട്ടൻ്റെ ആപ്പിൾമരം ഇവിടെയുണ്ട്

ശാസ്ത്രലോകത്തെ മാറ്റിമറിച്ച ഗുരുത്വാകർഷണ സിദ്ധാന്തത്തിന് പിന്നിൽ ഒരു ആപ്പിൾമരമുണ്ടെന്ന് ഏവർക്കുമറിയാം. . 400 വർഷത്തിലേറെ പഴക്കമുള്ള ആ മരം ഇന്നും ഇംഗ്ലണ്ടിലെ ലിങ്കൺഷയറിലുള്ള വൂൾസ്‌തോർപ്പ് മാനറിലെ (Woolsthorpe Manor) തോട്ടത്തിൽ തലയുയർത്തി നിൽക്കുന്നുണ്ട്. ചിത്രത്തിൽ ഇടതുവശത്തു കാണുന്ന  മരമാണ് ഐസക് ന്യൂട്ടന് ആ വിപ്ലവകരമായ ചിന്ത നൽകിയത്.

1666-ൽ ബുബോണിക് പ്ലേഗിനെത്തുടർന്ന് കേംബ്രിഡ്ജ് സർവകലാശാല അടച്ചിട്ടപ്പോൾ, ന്യൂട്ടൻ തന്റെ കുടുംബവീടായ വൂൾസ്‌തോർപ്പിലേക്ക് മടങ്ങിയെത്തിയിരുന്നു. ആ ഏകാന്തമായ സമയത്താണ് തോട്ടത്തിൽ നിന്ന് ഒരു ആപ്പിൾ താഴേക്ക് വീഴുന്നത് ന്യൂട്ടൻ ശ്രദ്ധിച്ചത്. വസ്തുക്കൾ എന്തുകൊണ്ട് ഭൂമിയിലേക്ക് തന്നെ വീഴുന്നു എന്നതിനെക്കുറിച്ച് ചിന്തിക്കാൻ ആ നിമിഷം അദ്ദേഹത്തിന് പ്രചോദനമായി. 

ഇത്രയും കാലം ഒരു ആപ്പിൾമരം അതിജീവിക്കുമോ എന്ന സംശയം സ്വാഭാവികമാണ്. അതെക്കുറിച്ചു പഠനങ്ങൾ നടക്കുകയും ചെയ്തു. വൂൾസ്‌തോർപ്പ് മാനറിലെ ഡെൻഡ്രോക്രോണോളജി (dendrochronology) പഠനങ്ങൾ ഇത് ഐസക് ന്യൂട്ടൻ കണ്ട ആ original മരം തന്നെയാണെന്ന് സ്ഥിരീകരിച്ചിട്ടുണ്ട്. 1820-കളിലുണ്ടായ ഒരു കൊടുങ്കാറ്റിൽ ഈ മരം കടപുഴകി വീണിരുന്നു. എന്നാൽ അതിശയിപ്പിക്കുന്ന വിധത്തിൽ അതിന്റെ വേരുകൾ (rootstock) നശിക്കാതെ നിലനിന്നു, പിന്നീട് അതേ വേരുകളിൽ നിന്ന് മരം വീണ്ടും വളരുകയായിരുന്നു.  നാഷണൽ ട്രസ്റ്റ് (National Trust) ആണ് ഇപ്പോൾ ഈ മരത്തെ സംരക്ഷിക്കുന്നത്. 'ഫ്ലവർ ഓഫ് കെന്റ്' (Flower of Kent) എന്ന് വിളിക്കപ്പെടുന്ന അപൂർവ്വയിനം ആപ്പിൾമരമാണിത്. ശാസ്ത്രത്തിന്റെ ചരിത്രം അടയാളപ്പെടുത്തിയ ആ മരം ഇന്നും ഓരോ സീസണിലും ഫലം നൽകിക്കൊണ്ട് തലമുറകൾക്ക് പ്രചോദനമായി നിലകൊള്ളുന്നു.

മറ്റൊരു രസകരമായ കാര്യം ചരിത്രത്തിലിന്നോളം പ്രചരിച്ചിരുന്നതുപോലെ ന്യൂട്ടണ് ആപ്പിൾ മരത്തിനു ചുവട്ടിലിരിക്കുന്പോൾ അദ്ദേഹത്തിന്റെ തലയില് ആപ്പിൾ വീണോ എന്നതിലെ സംശയമാണ്. അത്  പ്രചാരത്തിലുള്ള കഥയാണെങ്കിലും, അത് വാസ്തവത്തിൽ സംഭവിച്ചതാണോ എന്ന കാര്യത്തിൽ ചരിത്രകാരന്മാർക്കിടയിൽ ഭിന്നാഭിപ്രായങ്ങളുണ്ട്. ഇതുമായി ബന്ധപ്പെട്ട വസ്തുതകൾ താഴെ പറയുന്നവയാണ്.

ന്യൂട്ടന്റെ തലയിൽ ആപ്പിൾ വീണു എന്ന് അദ്ദേഹം തന്നെ രേഖപ്പെടുത്തിയതായി തെളിവുകളില്ല. മറിച്ച്, തോട്ടത്തിൽ ഇരിക്കുമ്പോൾ ആപ്പിൾ മരത്തിൽ നിന്ന് താഴേക്ക് വീഴുന്നത് ന്യൂട്ടൻ കാണുകയും, എന്തുകൊണ്ട് അത് മുകളിലേക്കോ വശങ്ങളിലേക്കോ പോകാതെ നേരെ താഴേക്ക് വീഴുന്നു എന്ന് അദ്ദേഹം ചിന്തിക്കുകയുമാണ് ചെയ്തത്. ന്യൂട്ടന്റെ ജീവചരിത്രകാരനായ വില്യം സ്റ്റ്യൂക്ലി (William Stukeley) തന്റെ കുറിപ്പുകളിൽ ഈ സംഭവം വിവരിച്ചിട്ടുണ്ട്. ആപ്പിൾ വീഴുന്നത് കണ്ടപ്പോൾ ന്യൂട്ടന് ഗുരുത്വാകർഷണത്തെക്കുറിച്ചുള്ള ചിന്ത വന്നതായി അദ്ദേഹം എഴുതിയിട്ടുണ്ടെങ്കിലും, ആപ്പിൾ ന്യൂട്ടന്റെ തലയിൽ തട്ടി എന്ന് അദ്ദേഹം ഒരിടത്തും പറയുന്നില്ല.

എന്നാൽ കാലക്രമേണ, കഥ കൂടുതൽ രസകരമാക്കാൻ വേണ്ടി ആപ്പിൾ അദ്ദേഹത്തിന്റെ തലയിൽ വീണു എന്ന് ചേർത്തുവെച്ചതാകാനാണ് സാധ്യത. ന്യൂട്ടന്റെ തലയിൽ ആപ്പിൾ വീണു എന്നത് ഒരു ലളിതമായ വിവരണമായി പിന്നീട് പ്രചരിക്കുകയായിരുന്നു. ചുരുക്കത്തിൽ, ഗുരുത്വാകർഷണ സിദ്ധാന്തത്തിലേക്ക് നയിച്ച ഒരു 'പ്രേരണ' എന്ന നിലയിൽ ആപ്പിൾ വീഴുന്നത് ന്യൂട്ടൻ കണ്ടിരുന്നു എന്നത് വസ്തുതയാണ്, എന്നാൽ അത് അദ്ദേഹത്തിന്റെ തലയിലാണ് വീണത് എന്നത് ഈ കഥയിലെ ഒരു അതിശയോക്തി മാത്രമാണ്.

ഇനി ചിത്രത്തിൽ കാണുന്ന രണ്ടു മരങ്ങളെക്കുറിച്ച്:  ന്യൂട്ടന്റെ ആപ്പിൾമരം എന്ന പേരിൽ രണ്ടു വ്യത്യസ്ത മരങ്ങളുടെ ചിത്രങ്ങൾ പലരെയും ആശയക്കുഴപ്പത്തിലാക്കാറുണ്ട്.  അതിൽ ഒരു വ്യക്തത വരുത്തേണ്ടതുണ്ട്. ന്യൂട്ടൻ തന്റെ ബാല്യകാലത്ത് താമസിച്ചിരുന്ന വൂൾസ്‌തോർപ്പ് മാനറിന്റെ പശ്ചാത്തലവും ആ യഥാർത്ഥമരത്തിന്റെ തായ് വേരിൽനിന്നും വളർന്നതുമാണ് ഇടതുവശത്തു കാണുന്നത്. 

വൂൾസ്‌തോർപ്പിലെ ആ യഥാർത്ഥ മരത്തിന്റെ ഒരു ശാഖയിൽ നിന്ന് (grafted offshoot)  ട്രിനിറ്റി കോളേജിൽ 1954-ൽ നടപ്പെട്ട മരമാണ്  വലതുവശത്തു കാണുന്നത്. ന്യൂട്ടനോടുള്ള ആദരസൂചകമായിട്ടാണ് ഈ മരം അവിടെ നട്ടുപിടിപ്പിച്ചത്. അതായത്, ചരിത്രപരമായ ആ 'ന്യൂട്ടൻ്റെ ആപ്പിൾമരം' വൂൾസ്‌തോർപ്പ് മാനറിൽ തന്നെയാണ് സ്ഥിതി ചെയ്യുന്നത്. ട്രിനിറ്റി കോളേജിൽ ഉള്ളത് അതിന്റെ ജനിതക പിന്തുടർച്ചാവകാശിയാണെന്നു മാത്രം.