'എങ്കിൽ കാക്ക മലന്നുപറക്കും' എന്ന പ്രയോഗം മലയാളികളുടെ ഇടയിൽ പതിവാണ്. അസാദ്ധ്യമായ കാര്യങ്ങളെ പരാമർശിക്കുന്പോഴാണ് ഇത് സംഭാഷണത്തിനിടയിൽ വരാറുള്ളത്. ഇതിനു സമാനമായി ഇംഗ്ലീഷിലുള്ള പ്രയോഗമാണ് When pigs fly എന്നത്. ഇപ്പോൾ ചൈനയിലെ ഒരു ഗ്രാമത്തിലെ ജനങ്ങൾക്ക് ഈ പഴഞ്ചൊല്ല് അക്ഷരാർത്ഥത്തിൽ അനുഭവിച്ചറിയേണ്ടി വന്നിരിക്കുകയാണ്. ആകാശത്തിലൂടെ പറന്ന ഒരു പന്നി കാരണം ഒരു ഗ്രാമം മുഴുവൻ പത്ത് മണിക്കൂറോളമാണ് ഇരുട്ടിലായത്!
ചൈനയിലെ സിചുവാൻ പ്രവിശ്യയിലുള്ള തോങ്ജിയാങ് കൗണ്ടിയിലാണ് സിനിമകളെ പോലും വെല്ലുന്ന ഈ അസംബന്ധ നാടകം അരങ്ങേറിയത്. ഒരു പ്രാദേശിക കർഷകൻ തന്റെ വളർത്തുപന്നിയെ അറവുശാലയിലേക്ക് കൊണ്ടുപോകാൻ കണ്ടെത്തിയ ഒരു 'കുറുക്കുവഴി'യാണ് വൻ കോമഡിയിൽ കലാശിച്ചത്. മലയോര മേഖലയായതുകൊണ്ട് തന്നെ റോഡ് മാർഗ്ഗം മൃഗങ്ങളെ കൊണ്ടുപോകുന്നത് ഏറെ ബുദ്ധിമുട്ടായിരുന്നു. ഇതിനൊരു പരിഹാരമായി കർഷകൻ ഒരു വലിയ ഡ്രോൺ വാടകയ്ക്കെടുക്കുകയും, പന്നിയെ കയറിൽ കെട്ടി ഡ്രോൺ വഴി ആകാശത്തിലൂടെ പറത്തി കൊണ്ടുപോകാൻ ശ്രമിക്കുകയുമായിരുന്നു.
എന്നാൽ ജനുവരി 24-ന് പുലർച്ചെ നടത്തിയ ഈ ആദ്യ പരീക്ഷണ ഫ്ലൈറ്റ് പാതിവഴിയിൽ പാളിപ്പോയി. നേരം വെളുക്കാത്തതിനാലുള്ള കാഴ്ചക്കുറവ് കാരണം, പന്നിയെ കെട്ടിയിരുന്ന കയർ നേരെ പോയി ഹൈ-വോൾട്ടേജ് പവർ ലൈനിൽ കുരുങ്ങുകയായിരുന്നു. ഇതോടെ ഡ്രോണും പന്നിയും വായുവിൽ തൂങ്ങിക്കിടക്കുന്ന അവസ്ഥയിലായി. ഇത് വൻ ഷോർട്ട് സർക്യൂട്ടിന് കാരണമാവുകയും ഗ്രാമത്തിലെ വൈദ്യുതി പൂർണ്ണമായും നിലയ്ക്കുകയും ചെയ്തു.
തനിയെ പ്രശ്നം പരിഹരിക്കാൻ കർഷകൻ ശ്രമിച്ചെങ്കിലും പരാജയപ്പെട്ടതിനെ തുടർന്ന് ഒടുവിൽ വൈദ്യുതി വകുപ്പ് ഉദ്യോഗസ്ഥരെ വിവരമറിയിച്ചു. 12 ജീവനക്കാർ വന്ന് ഏകദേശം 10 മണിക്കൂർ നീണ്ട കഠിനാധ്വാനത്തിനൊടുവിലാണ് പവർ ലൈനിലെ തകരാർ പരിഹരിച്ച് വൈദ്യുതി പുനഃസ്ഥാപിച്ചത്. ഈ അറ്റകുറ്റപ്പണികൾക്കായി മാത്രം ഏകദേശം 10,000 യുവാൻ (ഏകദേശം 1.2 ലക്ഷത്തോളം ഇന്ത്യൻ രൂപ) ചിലവ് വന്നു.
താൻ മനഃപൂർവ്വം ചെയ്തതല്ലെന്നും പുലർച്ചെ വെളിച്ചക്കുറവ് ഉണ്ടായതാണ് അപകടത്തിന് കാരണമെന്നും കർഷകൻ പോലീസിനോട് പറഞ്ഞു. എങ്കിലും, നിരോധിത മേഖലയിൽ ഡ്രോൺ പറത്തിയതിനും ഡ്രോണിന് താങ്ങാൻ കഴിയുന്നതിലും കൂടുതൽ ഭാരം കയറ്റിയതിനും കർഷകനെതിരെ പോലീസ് അന്വേഷണം ആരംഭിച്ചിട്ടുണ്ട്. നിയമലംഘനം സ്ഥിരീകരിച്ചാൽ ഇയാൾ പിഴയും അറ്റകുറ്റപ്പണി തുകയും നൽകേണ്ടി വരും.
ഗ്രാമവാസികളെ മുഴുവൻ ഇരുട്ടിലാക്കി ആകാശത്ത് തൂങ്ങിക്കിടക്കുന്ന പന്നിയുടെ ദൃശ്യം ഇപ്പോൾ സോഷ്യൽ മീഡിയയിൽ വലിയ രീതിയിൽ വൈറലായിരിക്കുകയാണ്. ഡ്രോണുകൾ ഗ്രാമീണ മേഖലകളിലെ കാർഷിക ആവശ്യങ്ങൾക്കും സാധനങ്ങൾ എത്തിക്കുന്നതിനും വേഗത കൂട്ടുമെങ്കിലും, കൃത്യമായ പ്ലാനിങ് ഇല്ലാതെ ഉപയോഗിച്ചാൽ വൻ പണികിട്ടുമെന്നതിന്റെ ഉത്തമ ഉദാഹരണമായി ഈ സംഭവം മാറി. എന്തായാലും "പന്നികൾ പറക്കും" എന്ന ചോദ്യത്തിന് ഇനി ലോകത്തിന് സംശയമില്ല, പക്ഷേ പവർ ലൈനുകളിൽ നിന്ന് അവ ദൂരെ നിൽക്കുന്നതാണ് എല്ലാവരുടെയും ആരോഗ്യത്തിന് നല്ലത്. പരിണതി എന്തുതന്നെയായാലും കർഷകന്റെ ഉദ്യമം അഭിനന്ദനീയമാണ്. തീർച്ചയായും സാങ്കേതിതവിദ്യയുപയുക്തമാക്കി പുതിയൊരു സാദ്ധ്യതയാണ് അദ്ദേഹം തുറന്നിട്ടിരിക്കുന്നത്.