ചാൾസിനുശേഷം കാമില രാജ്ഞിയാകുമോ ?

 

രാജാവ് ചാൾസ് മൂന്നാമൻ ആദ്യം അന്തരിക്കുകയാണെങ്കിൽ, കാമില രാജ്ഞി അടുത്ത ഭരണാധികാരിയാകുമോ ? ഇത് പലരും ചോദിക്കുന്ന ഒരു ചോദ്യമാണ്. ഇത് ഉന്നയിക്കുന്ന ചില ആർട്ടിക്കിളുകളും മാദ്ധ്യമങ്ങളിൽ പ്രത്യക്ഷപ്പെട്ടിരുന്നു.

പദവിയെക്കുറിച്ചുള്ള കാര്യങ്ങൾ രാജകുടുംബത്തിന്റെ പ്രോട്ടോക്കോളുകൾ പ്രകാരം മുൻകൂട്ടി നിശ്ചയിക്കപ്പെട്ടതാണ്. രാജാവിന്റെ മരണശേഷം, അടുത്ത കിരീടാവകാശിയായ പ്രിൻസ് വില്യം ആണ് രാജാവാകുക. അതോടെ വില്യമിന്റെ പത്നിയായ കെയ്റ്റ് മിഡിൽടൺ 'ക്വീൻ കൺസോർട്ട്' (Queen Consort) എന്ന പദവിയിലേക്ക് ഉയർത്തപ്പെടും. നിലവിൽ 'പ്രിൻസസ് ഓഫ് വെയിൽസ്' എന്ന പദവിയാണ് കെയ്റ്റ് വഹിക്കുന്നത്. ഭർത്താവ് രാജാവാകുന്നതോടെ രാജ്ഞിയുടെ എല്ലാ ബഹുമതികളും പദവികളും ഔദ്യോഗികമായി അവർക്ക് ലഭിക്കും.

ഈ സാഹചര്യത്തിൽ കാമില രാജ്ഞി ഒരു 'ക്വീൻ ഡൗവാജർ' (Queen Dowager) അഥവാ രാജാവിന്റെ വിധവ എന്ന പദവിയിലേക്ക് മാറും. ചരിത്രപരമായി രാജാവിന്റെ വിധവമാർ 'ക്വീൻ മദർ' എന്ന് അറിയപ്പെടാറുണ്ടെങ്കിലും, വില്യമിന്റെ ജൈവിക മാതാവല്ലാത്തതിനാൽ കാമില ഈ പദവി സ്വീകരിക്കില്ല. പകരം, അവർ 'ക്വീൻ കാമില' എന്ന പദവിയിൽ തന്നെ തുടരും.

നിയമപരമായി അവർക്ക് രാജ്ഞി എന്ന പദവിയിൽ തുടരാൻ അവകാശമുണ്ട്. രാജാവിന്റെ മരണശേഷം അവർക്ക് നൽകിയിരുന്ന ഔദ്യോഗിക വസതികൾ (ഉദാഹരണത്തിന് ക്ലാരൻസ് ഹൗസ്) മാറ്റി പുതിയ താമസസ്ഥലം വില്യം രാജാവിന്റെ തീരുമാനപ്രകാരം അനുവദിക്കും. കൂടാതെ, രാജകുടുംബത്തിന്റെ മുതിർന്ന അംഗമെന്ന നിലയിൽ തുടർന്നും പൊതുപരിപാടികളിലും സാമൂഹിക പ്രവർത്തനങ്ങളിലും അവർ സജീവമായി പങ്കെടുക്കും. രാജാവിന്റെ പത്നി എന്ന നിലയിലുള്ള ബഹുമതികളും ആദരവും അവർക്ക് ലഭിച്ചുകൊണ്ടിരിക്കും, എന്നാൽ ഭരണപരമായ അധികാരങ്ങളൊന്നും അവർക്ക് ഉണ്ടായിരിക്കുന്നതല്ല. പ്രിൻസ് വില്യമിന്റെ ഭരണകാലത്ത്, ഒരു 'മുതിർന്ന രാജകുടുംബാംഗം' എന്ന നിലയിലുള്ള പങ്കായിരിക്കും കാമില രാജ്ഞി വഹിക്കുക.

ചർച്ചകൾ ഇങ്ങനെയെല്ലാം നടക്കുമെങ്കിലും ചാൾസ് മൂന്നാമനെക്കുറിച്ച് ആശങ്കകൾക്കൊന്നും സ്ഥാനമില്ല. അദ്ദേഹത്തിന് 2024 ൽ ക്യാൻസർ ബാധയുള്ളതായി സ്ഥിരീകരിച്ചെങ്കിലും വിജയകരമായ ചികിത്സയിലൂടെ  ആരോഗ്യവാനായും ഊർജ്ജ്വസ്വലനായും തുടരുന്നതായാണ് റിപ്പോർട്ട്.